24 лістапада ў Іспаніі ва ўзросце 104 гадоў памёр біскуп Дам’ян Ігуасэн Бараў, які быў найстарэйшым у свеце каталіцкім іерархам.
Да 1991 года ён быў ардынарыем дыяцэзіі Сан-Крыстабаль-дэ-ла-Лагуны, пасля чаго выйшаў на пенсію па дасягненні 75-гадовага ўзросту.
Як са спасылкай на Канферэнцыю Каталіцкіх Біскупаў Іспаніі перадало Каталіцкае інфармацыйнае агенцтва КАІ, апошнія гады жыцця пажылы біскуп правёў у доме спакойнай старасці ў дыяцэзіі Уэска на паўночным усходзе краіны. Паведамляецца. што пахаванне іерарха пройдзе з захаваннем усіх неабходных санітарных прадпісанняў.
Дам’ян Ігуасэн Бараў нарадзіўся 12 лютага 1916 года ў Фуэнкальдэрасе (правінцыя Сарагоса), святарскае пасвячэнне прыняў у 1941 годзе.
У 1970 годзе Папа Павел VI менаваў яго ардынарыем дыяцэзіі Барбастра. Праз чатыры гады яго перавялі ў дыяцэзію Тэруэля і Альбарасіна, а з 1984 года да пенсіі Дам’ян Ігуасэн Бараў быў пастырам дыяцэзіі Сан-Крыстабаль-дэ-ла-Лагуны на Канарскіх астравах.
Пасля яго адыходу ў вечнасць найстарэйшым каталіцкім біскупам у свеце з’яўляецца 101-гадовы Фока Ніквігізэ, біскуп на пенсіі дыяцэзіі Рухенгеры ў Руандзе.
