У мінулыя дні свет абляцелі здымкі, на якіх славутая статуя Хрыста Адкупіцеля ў Рыа-дэ-Жанэйра асветлена ў колеры ліванскага сцяга.
Такім чынам у Бразіліі адрэагавалі на трагедыю, якая адбылася 4 жніўня ў порце Бейрута, дзе ў выніку моцных выбухаў загінулі не менш за 160 чалавек, а больш за 5 тыс. атрымалі раненні. Гэтыя лічбы не канчатковыя, паколькі з-за вялікіх разбурэнняў пакуль не ўсіх удалося знайсці. Каля 300 тыс. жыхароў горада засталіся без даху над галавой.
Помнік быў асветлены ў колеры ліванскага сцяга 6 жніўня, у свята Перамянення Пана. Як паведаміла Каталіцкае інфармацыйнае агенцтва КАІ, гэта была ініцыятыва Генеральнага консула Лівана ў Рыа-дэ-Жанэйра, мясцовага ліванскага зямляцтва, а таксама Каталіцкага Касцёла і іншых хрысціянскіх супольнасцяў у Бразіліі.
На думку генеральнага консула, гэта стала сімвалічным жэстам салідарнасці з ліванскім народам, які, нягледзячы на сваю трагічную гісторыю, заўсёды знаходзіў сілы адраджацца і не падаць пад цяжарам няшчасцяў і цярпення.
Прэзідэнт Бразіліі Жаір Балсанару публічна заявіў, што яго краіна таксама скіруе канкрэтную дапамогу пацярпелым жыхарам Лівана.
