З 15 па 18 чэрвеня ўпершыню з лістапада мінулага года адбываецца пасяджэнне Канферэнцыі біскупаў Аўстрыі, галоўныя тэмы якога — крызіс, выкліканы каранавірусам, і выбары новага старшыні епіскапату.
Як паведамляе Каталіцкае інфармацыйнае агенцтва КАІ, абраць новага старшыню неабходна, паколькі кардынал Крыстаф Шонбарн, якому зімой споўнілася 75 гадоў, у лісце да біскупаў адмовіўся ад гэтай пасады.
Мітрапаліт Вены ўзначаліў цэлебрацыю святой Імшы, якая адкрые летняе пасяджэнне біскупаў. Сустрэча традыцыйна праходзіць у санктуарыі ў Марыяцэлі.
Выбары новага старшыні аўстрыйскага епіскапату павінны былі адбыцца на веснавым пасяджэнні, у сакавіку, але не прайшлі з-за выбуху пандэміі каранавірусу.
Тады біскупы папрасілі кардынала Шонбарна застацца на пасадзе старшыні, а адначасова была склікана спецыяльная камісія, у якую акрамя Мітрапаліта Вены ўвайшлі намеснік старшыні епікапату арцыбіскуп Зальцбуржскі Франц Лакнер, біскуп Лінцкай дыяцэзіі Манфрэд Шоер і біскуп дыяцэзіі Грац-Зэкау Вільгельм Краўтвашль. Кожны тыдзень камісія праводзіла відэаканферэнцыі і займалася найважнейшымі праблемамі, выкліканымі крызісам каранавірусу.
Усе ўдзельнікі пасяджэння епіскапату павінны захоўваць меры бяспекі, неабходныя ў час пандэміі. Сакратар епіскапату кс. Пэтэр Шыпка распавёў, што перад прыбыццём у Марыяцэль кожнаму быў зроблены тэст на каранавірус. Праграма пасяджэння дастасавана да сённяшняй сітуацыі. Напрыклад, не будзе навучальнага дня з запрошанымі гасцямі, а таксама традыцыйнай Імшы, якую на заканчэнне пасяджэння цэлебравалі ў санктуарыі звычайна ўсе біскупы з удзелам шматлікіх вернікаў.
Адна з галоўных тэм пасяджэння — крызіс, выкліканы каранавірусам.
Удзельнікі пасяджэння плануюць ацаніць касцёльнае жыццё ў апошнія месяцы, калі дзейнічалі шматлікія абмежаванні.
Акрамя наступстваў крызісу каранавірусу для ўсяго грамадства, будуць абмеркаваны яго наступствы для Касцёла.
У пасяджэнні ўпершыню ўдзельнічае новы біскуп дыяцэзіі Гурк-Клагенфурт Ёзэф Маркец. Таксама з іерархамі сустрэнецца Апостальскі нунцый у Аўстрыі арцыбіскуп Пэдро Лопес Кінтанa.
Важным пунктам сустрэчы стануць выбары новага старшыні епіскапату Аўстрыі. Яго абяруць з ліку дыяцэзіяльных біскупаў.
Кардынал Шонбарн з’яўляўся старшынёй Канферэнцыі біскупаў Аўстрыі на працягу 22 гадоў, з чэрвеня 1998 г.
На чарговы шасцігадовы тэрмін ён быў абраны ў лістападзе 2016 г.
Епіскапат Аўстрыі налічвае 15 членаў: дзевяць дыяцэзіяльных біскупаў, вайсковы ардынарый, чатыры дапаможныя біскупы і абат цыстэрцыянаў у Ветынген-Мерэраў.
