Забойства Джорджа Флойда 25 мая афіцэрам паліцыі Мінеапаліса ў ЗША выклікала пастаянныя пратэсты на працягу тыдня ў гарадах па ўсёй краіне, некаторыя з якіх перараслі ў насілле і ў пагромы.
Як паведамляе агенцтва CNA, у Мінеапалісе, дзе пачаліся пратэсты, 29 мая падчас іх базыліка святой Марыі была нязначна пашкоджана. Пад лаўкай было ўчынена падпальванне, але агонь не распаўсюдзіўся за межы лаўкі.
На святыні ў Каліфорніі, Мінесоце, Нью-Ёрку, Кентукі, Тэхасе і Каларада таксама быў учынены напад.
Многія з гэтых святыняў, якія былі пашкоджаны, з’яўляюцца базылікамі.
Базыліка Беззаганнага Зачацця ў Дэнверы зведала непапраўны ўрон. Брамы вакол яе былі пашкоджаны, і слёзатачывы газ, выпушчаны для разгону пратэстаў, пранік у будынак. Лічыцца, што дзверы базылікі былі непапраўна сапсаваны ў выніку вандалізму, і, як мяркуюць, іх неабходна будзе замяніць.
З боку аўтастаянкі былі вынесены тры мяхі з камянямі, але найбольш каштоўныя вітражы базылікі засталіся цэлымі і непашкоджанымі. Іншыя вокны ў святыні былі разбітыя.
На базыліцы св. Патрыка ў Нью-Ёрку былі намаляваны графіці, у тым ліку «Няма справядлівасці — няма міру», BLM (Black Lives Matter), NYPDK. Імя Джорджа Флойда было напісана на ўсходах базылікі.
У нядзелю кардынал Цімаці Долан, арцыбіскуп Нью-Ёркскі і старшыня Камісіі рэлігійных лідараў (CORL), выступіў з сумеснай заявай, асудзіўшы забойства Флойда, а таксама насілле і рабаванні.
«Мы паважаем тых, хто хоча ўшанаваць памяць Джорджа Флойда мірным пратэстам супраць жаху, зла і граху, якімі з’яўляецца расізм, — было адзначана ў заяве. — Мы таксама падтрымліваем членаў сям’і Флойда, якія, у прыватнасці, сказалі: “Мы не можам ставіць пад небяспеку адзін аднаго, бо мы адрэагавалі на заклік выражаць сваё меркаванне і абурэнне ў адзіным парыве”. Рабаванні і насілле не даюць магчымасці пачуць наш калектыўны голас».
