Незвычайная Эўхарыстычная працэсія адбылася ў нядзелю 24 мая ў Нью-Ёрку: святар прайшоў па вуліцах горада з Найсвяцейшым Сакрамэнтам, благаслаўляючы на адлегласці вернікаў і іх дамы.
Відэа з працэсіі з’явілася на сайце інфармацыйнага агенцтва Reuters. Эўхарыстычная працэсія нагадвала тыя, што адбываюцца на ўрачыстасць Божага Цела.
Яе правёў пробашч нью-ёркскай парафіі Маці Божай Каралевы надзеі кс. Пітэр Пэрпара.
Святар прызнаўся, што «адчуваў патрэбу ў тым, каб суцешыць вернікаў, якія ўжо некалькі месяцаў не могуць памаліцца ў касцёле, і таму вырашыў „прынесці“ ім касцёл дадому».
У кароткім відэа можна ўбачыць, як пробашч разам з некалькімі іншымі святарамі і прыслугоўваючымі ідзе ад дома да дома і пры гэтым благаслаўляе сабраныя перад дамамі сем’і.
Падобная працэсія ўжо не ўпершыню адбываецца ў Нью-Ёрку падчас пандэміі каранавірусу, калі ўсе касцёлы ў горадзе ў межах каранціну закрытыя для вернікаў. Крыху раней адзін са святароў разам з законнымі сёстрамі таксама прайшоў па вуліцах горада з Найсвяцейшым Сакрамэнтам, благаслаўляючы ім каталіцкія сем’і.
Паколькі па рашэнні ККББ сёлета ў Беларусі былі адменены традыцыйныя працэсіі Божага Цела па вуліцах нашых гарадоў і іншых населеных пунктаў, амерыканскі вопыт паказвае, як можна правесці Эўхарыстычную працэсію падчас пандэміі без пагрозы заражэння.
