11 мая Старшыня Канферэнцыі епіскапату Польшчы арцыбіскуп Станіслаў Гандэцкі запрасіў карыстальнікаў сацыяльных сетак ва ўсім свеце далучыцца да ініцытывы #ThankYouJohnPaul2.
Як паведамляе Каталіцкае інфармацыйнае агенцтва КАІ, такім хэштэгам прапануецца пазначаць у сацыяльных сетках публікацыі, здымкі і відэа з падзякай святому Яну Паўлу ІІ. Акцыя прысвечана 100-й гадавіне з дня нараджэння Вялікага Папы, якая прыпадае ў наступны панядзелак, 18 мая.
«Такім чынам мы можам выразіць нашу падзяку Папу Яну Паўлу ІІ за тое, што ён унёс і працягвае ўносіць у наша асабістае, сямейнае і грамадскае жыццё.
За ўсе сустрэчы з ім, у якіх мы маглі ўдзельнічаць, за яго словы, якія найбольш памятаем, за натхненні, якія ён у нас абудзіў і абуджае. Можам публікаваць і звязаныя з ім успаміны. Такім чынам мы распавядзем пра святога Яна Паўла ІІ таксама маладому пакаленню, якое не мела магчымасці бліжэй пазнаць гэтага Папу, і пры гэтым так актыўна карыстаецца менавіта сацыяльнымі сеткамі», — падкрэсліў арцыбіскуп Гандэцкі.
Ініцыятыва #ThankYouJohnPaul2 — «Дзякуй табе, Яне Паўле ІІ» — носіць сусветны характар і праводзіцца пры падтрымцы Канферэнцыі епіскапату Польшчы.
Задума заключаецца ў тым, што карыстальнікі сацыяльных сетак сваімі публікацыямі, відэа і здымкамі створаць віртуальны «юбілейны торт» на 100-годдзе з дня нараджэння святога Яна Паўла ІІ. Вялікі Папа ўжо ў 2002 годзе заклікаў увесь Касцёл «адважна пераступіць гэты новы парог» і выплыць «на глыбіню кіберпрасторы» для евангелізацыі.
