30 чэрвеня ў саборы Маці Божай Зарваніцкай, што на Цярнопальшчыне ва Украіне, адбылася ўрачыстая архіерэйская Боская Літургія з нагоды надання святыні статусу Малой базылікі.
Як паведамляе дэпартамент інфармацыі УГКЦ, у Літургіі ўзялі ўдзел Першавярхоўны арцыбіскуп Украінскай Грэка-Каталіцкай Царквы Святаслаў Шаўчук, Апостальскі нунцый ва Украіне арцыбіскуп Клаўдыё Гуджэроцці, іерархі, духавенства, вернікі і пілігрымы, а таксама прадстаўнікі ўкраінскіх дзяржаўных уладаў.
«Сёння ў Зарваніцы мы перажываем асаблівую хвіліну. Для мноства людзей Зарваніца ўвасабляе сабою як быццам бераг Галілейскага мора. Мы прыходзім сюды, стомленыя жыццёвым морам. Нас заліваюць хвалі; гэтае мора ніколі не бывае спакойным <…>. І мы шукаем пэўнага берагу, да якога можна прыстаць, гэта значыць, прагнем надзейнасці ў нашым жыцці.
Усе абяцаюць нам стабільнасць. „Стабільнасць“ — гэта такое нейкае чароўнае слова, якое гучыць з вуснаў многіх.
Але ж мы разумеем, што стабільнасць, дабрабыт і мір знойдзе толькі той, хто прыстане да берага, па якім і сёння сярод нас праходзіць Хрыстус», — адзначыў у прамоўленым слове Першавярхоўны арцыбіскуп УГКЦ Святаслаў Шаўчук.
Паводле высокага ўкраінскага іерарха, Сын Божы — гэта надзейная апора для кожнага чалавека. У хвіліну разгубленасці ён заклікае ісці да Зарваніцкай Маці Божай, якая дапаможа знайсці правільны шлях у жыцці.
«Для хрысціянаў Дзева Марыя — гэта асоба сапраўднай Настаўніцы, якая „злавіла“ ўсё чалавецтва і прывяла яго да свайго Сына. Яна і сёння паказвае нам шлях да свайго Сына і кажа: „Прыйдзіце да Яго!“ Яна — настаўніца сапраўднай веры.
І дзеля таго, каб падкрэсліць, наколькі важным берагам для ўкраінскага народа з’яўляецца Зарваніца, сёння адбываецца важная падзея: рашэннем Святога Айца Францішка гэты сабор Маці Божай Зарваніцкай атрымлівае сусветнае імя, становячыся малою папскаю базылікаю.
Гэтае святое месца атрымлівае прызнанне паўсюднай Царквы. Папа як быццам жадае сёння сказаць: калі хтосьці жадае ўратавацца ад навальніцаў жыццёвага мора — спяшайцеся ў Зарваніцу. Вашая Маці чакае вас там», — сцвердзіў кіраўнік УГКЦ.
На заканчэнне Літургіі Апостальскі нунцый Клаўдыё Гуджэроцці зачытаў дакумент, падпісаны папам Францішкам, якім засведчыў наданне статусу малой папскай базылікі сабору ў Марыйным духоўным цэнтры «Зарваніца».
Пасля гэтага арцыбіскуп Васіль Семянюк, Мітрапаліт Цярнопальска-Збораўскі, на тэрыторыі якога знаходзіцца малая базыліка, звярнуўся да прадстаўніка Святога Айца ва Украіне і да Першавярхоўнага арцыбіскупа са словамі ўдзячнасці, а таксама падараваў ім памятныя іконы Маці Божай Зарваніцкай.
Даведка
«Малая базыліка» — гэта тытул, які Папа надае некаторым асабліва важным святыням. Першапачаткова базылікай называліся святыні, пабудаваныя паводле пэўных архітэктурных канонаў, аднак з XVII стагоддзя тэрмін больш не прывязаны да архітэктуры і падкрэслівае не архітэктурныя асаблівасці, а значнасць сакральнага будынку.
Сабор на Цярнопальшчыне, дзе ўшаноўваецца цудадзейная ікона Маці Божай Зарваніцкай, стаў першай грэка-каталіцкай святыняй ва Украіне, якая атрымала гэты высокі статус ад Святога Айца.
Чатыры галоўныя святыні Рыма маюць статус Вялікіх папскіх базылік, а малых базылік у свеце налічваецца каля 1600. Малой базылікай з’яўляецца таксама Нацыянальны санктуарый Маці Божай Будслаўскай у Беларусі.
