Vive Cristo, esperanza nuestra — «Няхай жыве Хрыстус, наша надзея» — так гучыць назва паслясінадальнай Апостальскай адгартацыі ў форме ліста да моладзі, якую папа Францішак падпіша ў Ларэта 25 сакавіка.
Яу паведаміла беларуская рэдакцыя партала Vatican News, арыгінальны тэкст дакумента напісаны на іспанскай мове. Папа хоча даверыць яго Найсвяцейшай Панне Марыі, менавіта таму скіруецца ў сусветна вядомы санктуарый Маці Божай ва ўрачыстасць Звеставання Пана. У гэтым італьянскім санктуарыі на беразе Адрыятычнага мора захоўваецца «хатка Марыі» — невялікі дом, прывезены з Назарэта, у якім і адбылося Звеставанне.
Адгартацыя з’яўляецца вынікам працы Сінода Біскупаў, які праходзіў у Ватыкане з 3 па 28 кастрычніка мінулага года на тэму «Моладзь, вера і распазнанне паклікання».
Тэкст дакумента будзе апублікаваны пасля падпісання і прадстаўлены на спецыяльнай прэс-канферэнцыі, якую арганізуе прэс-служба Святога Пасаду.
