З нагоды 100-годдзя незалежнасці Польшчы папа Францішак накіраваў віншавальны зварот старшыні польскага епіскапату арцыбіскупу Станіславу Гандэцкаму.
«Са сканчэннем Першай сусветнай вайны, — піша Пантыфік, — завяршыўся перыяд расійскага, прускага і аўстрыйскага валадарання над народам, які да яго падзелу спрыяў фарміраванню гісторыі хрысціянскай Еўропы, з усім багаццем сваёй высакароднай культуры і духоўнасці.
Заваяванне незалежнасці каштавала ахвяраў многім сынам Польшчы, гатовым заплаціць сваёй асабістай свабодай, маёмасцю і нават жыццём за страчаную Айчыну».
Папа Францішак цытуе св. Яна Паўла ІІ, які сцвярджаў, што пошук свабоды «быў заснаваны на надзеі, якая сыходзіла з глыбокай веры ў дапамогу Бога, Валадара гісторыі людзей і нацый».
Папа Францішак дзякуе Богу, які ўмацаваў наступныя пакаленні Сваёй ласкай і сілай, так што польскі народ змог захаваць свабоду, нягледзячы на «балючыя гістарычныя падзеі, звязаныя з Другой сусветнай вайной, нацысцкай акупацыяй і камуністычным рэжымам».
У канцы звароту Святы Айцец зноў цытуе Караля Вайтылу, прыводзячы яго малітву «аб ласках веры, надзеі і любові для ўсіх палякаў, каб у адзінстве і міры яны выкарыстоўвалі для дабра настолькі каштоўны дар свабоды».
