Пошук


25.10.2018 16:33   Фота: Vatican Media / Catholic.by

Раніцай 25 кастрычніка ўдзельнікі Сіноду Біскупаў разам з моладдзю з рымскіх парафій здзейснілі пешую пілігрымку да катэдры св. Пятра.

Як паведамляецца, пілігрымка аб’яднала на супольным шляху да канфесіі — месца пахавання — св. апостала Пятра каля 300 удзельнікаў, сярод якіх 192 Айцы Сіноду, у тым ліку 101 біскуп, 9 кардыналаў, 82 аўдытары і свецкія эксперты, а таксама каля сотні юнакоў і дзяўчат з Рымскай дыяцэзіі.

Пілігрымы прайшлі каля шасці кіламетраў ад паўночнай часткі Вечнага горада да ватыканскай базылікі. Маршрут пралягаў па старажытнай «Дарозе франкаў» (лац. Via Francigena) — адным з самых папулярных у сярэднявечнай Еўропе пілігрымкавым шляху, які браў свой пачатак ад Кентэрберыйскай катэдры ў Англіі і завяршаўся ў Рыме.

У пілігрымцы браў удзел дэлегат ад Касцёла ў Беларусі на XV Звычайнай Асамблеі Сіноду Біскупаў Мітрапаліт Мінска-Магілёўскі арцыбіскуп Тадэвуш Кандрусевіч.

Дзелячыся ўражаннямі ад пілігрымкі, беларускі іерарх, у прыватнасці, паведаміў Catholic.by:

«Шырыня гэтай так званай „Дарогі франкаў“ змяняецца ад 2–3 метраў да аднаго, так што часам пілігрымы павінны былі ісці гужам. Камяні старажытнага бруку дзе-нідзе захаваліся яшчэ з рымскіх часоў.

На сваім шляху пілігрымы падняліся на ўзгорак вышынёй 139 метраў. У Сярэднявеччы яго называлі гарой Радасці (Mons Gaudii), бо з яго адкрываецца велічны від базылікі св. Пятра.

У пілігрымцы былі тры малітоўныя прыпынкі, падчас якіх чыталіся адпаведныя разважанні.

На першым прыпынку разважалі пра духоўнае значэнне пілігрымкі на падставе Евангелля пра вучняў з Эмаўс. На другім разважалі пра Рым як горад Пятра і Паўла, дзе яны далі сведчанне вернасці Хрысту сваёй мучаніцкай смерцю. На трэцім, які адбыўся на плошчы святога Пятра, разважалі пра святых, якія яднаюць неба і зямлю і паказваюць дарогу да вечнага шчасця.

Падчас супольнай малітвы каля канфесіі св. Пятра. Фота Vatican News

Акрамя таго, падчас пілігрымкі яе ўдзельнікі спявалі рэлігійныя песні і маліліся Ружанец», — сказаў арцыбіскуп Тадэвуш Кандрусевіч.

У базыліцы св. Пятра пілігрымы прынялі ўдзел у Эўхарыстыі, якую ўзначаліў Генеральны сакратар Сіноду Біскупаў кардынал Ларэнцо Балдзісэры. Гамілію прамовіў арцыбіскуп Рыно Фізікела, старшыня Папскай рады па новай евангелізацыі. У гаміліі ватыканскі іерарх нагадаў пра значэнне паклікання і місіі св. Пятра.

Мы вызнаем боскасць Езуса так, як вызнаў яе Пётр, хоць мы таксама слабыя і можам адрачыся ад Езуса, як учыніў Пётр, але павінны па яго прыкладу вярнуцца да Хрыста і сказаць, што Яго любім.

У гэтым павінна праяўляцца наша хрысціянства і вера, падкрэсліў арцыбіскуп Фізікела.

Разам з біскупамі і моладдзю маліўся таксама папа Францішак.

Абноўлена 25.10.2018 17:49
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа