Вечарам 10 кастрычніка ў межах Сіноду Біскупаў, прысвечанага моладзі, які праходзіць у Рыме, адбыліся свабодныя дыскусіі. У іх прыняў удзел арцыбіскуп Тадэвуш Кандрусевіч, старшыня Канферэнцыі Каталіцкіх Біскупаў у Беларусі.
Сваё выступленне беларускі іерарх прысвяціў неабходнасці захавання літургічных нормаў і прыгажосці літургіі. Аб гэтым, па словах арцыбіскупа, на жаль, вельмі часта забываецца. У той жа час, нагадаў Мітрапаліт Кандрусевіч, моладзь, як падкрэслівае Падрыхтоўчы дакумент Сіноду, хоча прымаць удзел у літургіі, якая адпавядае ўстаноўленым Касцёлам нормам, бо літургія – крыніца і вяршыня рэлігійнага жыцця.
«На жаль, нярэдка можна бачыць, што мы страцілі гэту праўду, – дадаў арцыбіскуп. – У выніку літургічныя цэлебрацыі становяцца тэатрам, у якім святар грае ролю непадрыхтаванага артыста».
Старшыня беларускага епіскапату распавёў наступную гісторыю. Аднойчы няверуючыя зайшлі ў касцёл падчас святой Імшы. Пасля яны сказалі: «Хор спяваў вельмі добра, гледачы былі ўважлівымі, але артыст на сцэне быў ніякім».
«Гэта наша віна, што мы страцілі духоўнае значэнне літургіі», – адзначыў арцыбіскуп Кандрусевіч.
Беларускі іерарх заклікаў Сінод рэанімаваць сапраўднае значэнне і прыгажосць літургіі, якую моладзь любіць і жадае, каб яе пажаданні былі задаволены, з мэтай яе духоўнай фармацыі і суправаджэння па жыцці.
