Увечары 6 кастрычніка ў ватыканскай зале Паўла VI некалькі тысяч юнакоў і дзяўчат прынялі ўдзел у сустрэчы з Папам і іншымі ўдзельнікамі XV Звычайнай Асамблеі Сіноду Біскупаў.
Кранальныя сведчанні, спевы, артыстычныя прадстаўленні, відэазамалёўкі аб турботах, радасцях і марах сучаснай моладзі складалі галоўную частку чування, арганізаванага Кангрэгацыяй Каталіцкай Адукацыі. Маладыя людзі распавядалі пра свой досвед, звязаны з рознымі жыццёвымі сітуацыямі, вучобай, працай, пачуццямі, мінулым і распазнаннем паклікання.
Папа асабіста пажадаў сустрэцца з юнакамі і дзяўчатамі, каб іх прапановы маглі ўзбагаціць выніковы дакумент Сіноду Біскупаў, які цяпер праходзіць у Рыме. Гаворачы пра шматлікія пытанні моладзі, папа Францішак зазначыў, што адказы на іх дадуць менавіта Сінадальныя айцы, бо калі б гэта зрабіў ён, Сінод быў бы непатрэбны.
У той жа час Пантыфік даў сваім гасцям некалькі парадаў. У першую чаргу ён заклікаў моладзь пастаянна знаходзіцца ў дарозе, гледзячы наперад, а не ў люстэрка.
Важна быць юнакамі і дзяўчатамі, якія не праводзяць свой час на канапе, як 24-гадовыя пенсіянеры, сказаў Папа.
Ён параіў моладзі шукаць сябе, выходзячы насустрач дабру і прыгажосці.
Паводле Святога Айца, важнымі рэчамі з’яўляюцца шчырасць і паслядоўнасць у жыцці. Папа сказаў, што разумее крытыку ў адрас Касцёла, калі ён вучыць евангельскім благаслаўленням, а сам паддаецца «прынцападобнаму і скандальнаму клерыкалізму», які з’яўляецца найгоршым скажэннем сутнасці касцёльнага служэння.
Пантыфік зазначыў, што сапраўдная ўлада выражаецца ў тым, каб дапамагаць людзям узрастаць. Іншае разуменне ўлады — гэта праява эгаізму і жадання прыніжаць і знявольваць людзей, перакананы ён.
Святы Айцец нагадаў пра важнасць разважлівага выкарыстання сучасных сродкаў камунікацыі.
Ён падкрэсліў, што гаджэты не павінны адцягваць ад рэальнага жыцця і ад сустрэчы з канкрэтнымі людзьмі. Калі так адбываецца, трэба абмежаваць карыстанне імі.
Канкрэтнасць, паводле яго словаў, павінна выражацца таксама ў гасціннасці. Папа асудзіў папулізм, скіраваны супраць мігрантаў, і зазначыў, што гэтая папулярная сёння з’ява не мае нічога супольнага з сапраўднай культурай народа. Папулізм — гэта закрытасць, а любоў адкрывае дзверы, сказаў ён.
На заканчэнне сустрэчы Святы Айцец параіў моладзі часцей размаўляць з пажылымі людзьмі, якія з’яўляюцца каранямі, без якіх немагчыма прыносіць плёны. Дзякуючы гэтым караням моладзь, у сваю чаргу, можа стаць карэннем для іншых пакаленняў, сцвердзіў Святы Айцец.
Перад тым як пакінуць залу Паўла VI, Пантыфік атрымаў ад моладзі спіс пытанняў, якія перадасць айцам Сіноду.
