«Жанчына — апора ў будынку Касцёла і грамадства ў Лацінскай Амерыцы», — такую тэму выбраў папа Францішак для пленарнага пасяджэння Папскай камісіі па Лацінскай Амерыцы, якое праходзіць у Ватыкане з 6 па 9 сакавіка.
Выбраная тэма сугучная са словамі Святога Айца, скіраванымі да ўдзельнікаў Рады біскупаў Лацінскай Амерыкі (Celam). «Надзея Лацінскай Амерыкі мае жаночае аблічча! — сцвердзіў Папа. — Без жанчын Касцёл на кантыненце згубіў бы здольнасць няспынна адраджацца». Жаночае вымярэнне збаўлення бярэ пачатак ад Марыі, ад Маці-Касцёла, ад матуляў і бабуляў.
З другога боку, Пантыфік падчас свайго нядаўняга візіту ў Перу звярнуў увагу таксама на несправядлівасці, ад якіх пакутуюць многія жанчыны: на пануючы ў рэгіёне «мачызм» (адносіны перавагі мужчын над жанчынамі), на тое, што яны часта застаюцца самотнымі маці і павінны самі клапаціцца пра ўтрыманне і выхаванне патомства, на дыскрымінацыю з боку працадаўцаў, а таксама на тое, што менавіта жанчыны найбольш пакутуюць ад беднасці і праяваў насілля.
Для абмеркавання «жаночай» тэмы было б недастаткова сабраць толькі членаў камісіі, кардыналаў і біскупаў, таму папа Францішак у якасці выключэння дазволіў запрасіць на пасяджэнне таксама 15 жанчын з Лацінскай Амерыкі. Плануецца заслухаць даклады, якія датычацца розных аспектаў жыцця жанчын у рэгіёне, а таксама абмеркаваць ролю жанчыны ў сям’і, у сферы абароны жыцця, у выхаванні і катэхізацыі, у міласэрным служэнні бедным, у абароне стварэння і ў іншых сферах дзейнасці Касцёла і грамадства.
У сувязі з тым, што на час працы пленарнага пасяджэння прыпадае Міжнародны жаночы дзень, 8 сакавіка запланавана вячэра ў гонар жанчын, якія працуюць у Ватыкане. Паколькі нерэальна сабраць на ёй усіх ватыканскіх супрацоўніц, бо іх тут працуе каля 700, на вячэру было вырашана запрасіць сімвалічную дэлегацыю жанчын (30–40 асобаў), якія прадставяць усіх жанчын свету.
У пятніцу ўсіх удзельнікаў пленарнага пасяджэння Папскай камісіі па Лацінскай Амерыцы прыме на аўдыенцыі Святы Айцец.
