Міжнародны футбольны чэмпіянат Clericus Cup пройдзе ў Ватыкане ўжо ў 12-ы раз. Сёлета футбольныя матчы будуць арганізаваны па прынцыпе Лігі чэмпіёнаў, у іх прымуць удзел святары, семінарысты і студэнты з 70 краін свету.
На працягу чатырох дзён на поле выйдуць 16 каманд. Упершыню на Clericus Cup сёлета будзе працаваць футбольны суддзя-святар.
Яшчэ адным новаўвядзеннем у правілы Clericus Cup стане трэці перыяд, як у рэгбі, а перапынак паміж выхадамі на поле футбалісты будуць прысвячаць агульнай малітве.
Паводле слоў прэс-сакратара Італьянскага спартыўнага цэнтра Фелічэ Альбаргеці, за 12 гадоў у Clericus Cup прынялі ўдзел 370 спартсменаў-аматараў і было забіта каля 1 500 галоў.
Чэмпіянат паслужыў аналагам для правядзення спаборніцтваў і ў іншых краінах, у прыватнасці ў Азіі і ў Афрыцы, паколькі многія яго былыя ўдзельнікі-семінарысты сталі святарамі і вярнуліся ў свае дыяцэзіі.
Падзею будзе асвятляць Radio Vaticana Italia. Таксама чэмпіянат асвятляе Папская радыёстанцыя, супрацоўніцтва з якой сёлета стане яшчэ больш цесным: у эфір выйдуць спецыяльныя рэпартажы, прысвечаныя асобным спартсменам, і гісторыі духоўных семінарый, у якіх вучацца маладыя футбалісты.
Паводле слоў вядучага праграмы «Не толькі спорт» Джанкарло Ла Веллы, Clericus Cup заўсёды выклікае ў гледачоў вялікую цікавасць. Адной з важных асаблівасцяў чэмпіянату стане правіла, згодна з якім трэцяя картка будзе азначаць часовае, а не канчатковае выдаленне, як гэта прынята ў водным пола.
Даведка:
Спаборніцтвы арганізуе каталіцкая федэрацыя спорту Італіі. Ідэя правядзення Clericus Cup належыць Дзяржсакратару папы Бэнэдыкта XVI кардыналу Тарчызіо Бэртонэ, які з’яўляецца гарачым прыхільнікам футболу.
