Падчас ранішняй Эўхарыстыі ў Ватыкане 13 лістапада папа Францішак разважаў пра спакусы, якія «раняць сэрцы і забіваюць надзею».
«Непазбежна, што будуць з’яўляцца спакусы», але «гора таму, праз каго яны прыходзяць», — адзначыў Папа, спасылаючыся на словы з літургічнага евангельскага чытання (Лк 17,1-6)».
Спакусы могуць не толькі раніць, але і забіваць
Святы Айцец заклікаў вернікаў быць пільнымі, каб не спакушаць іншых людзей, бо спакусы «раняць чуллівасць і слабасць Божага народу, а вельмі часта гэтыя раны застаюцца на ўсё жыццё».
Больш за тое, «спакусы могуць не толькі раніць, а нават забіваць: забіваць надзею, забіваць мары, забіваць сем’і, забіваць вялікую колькасць сэрцаў», — падкрэсліў Папа.
«Колькі хрысціян сваімі паводзінамі і сваёй непаслядоўнасцю аддаляюць людзей. Непаслядоўнасць — гэта адзін з самым простых відаў зброі, якую мае д’ябал, каб аслабіць Божы народ і аддаліць яго ад Пана», — нагадаў Пантыфік. Святы Айцец дадаў, што такая непаслядоўнасць заключаецца ў тым, каб казаць адно, а рабіць адваротнае.
Паводле папы Францішка, такое стаўленне спакушае людзей. У якасці прыкладу непаслядоўных асобаў Папа Рымскі прывёў прадпрымальнікаў, якія называюць сябе хрысціянамі, але не плацяць сваім працаўнікам належнага заробку, ці нават эксплуатуюць іх дзеля ўласнай выгады.
«Спакушаць могуць і пастыры Касцёла, калі больш думаюць пра грошы, чым пра людзей»
Спакушаць падобным чынам могуць таксама і пастыры Касцёла, якія не клапоцяцца належным чынам пра давераны ім статак. Калі пастыры больш думаюць пра грошы, чым пра людзей, яны спакушаюць.
Тое самае адбываецца, калі яны славалюбівыя, а не сціплыя і пакорныя, або калі з’яўляюцца пыхлівымі і жадаюць панаваць над іншымі.
«Сёння можа быць цудоўны дзень, каб зрабіць рахунак сумлення з гэтага: ці спакушаю яе, і калі так, то як? І так мы можам адказаць Пану і крыху наблізіцца да Яго», — закончыў сваю гамілію Святы Айцец.
