12 кастрычніка ў Папскім Грыгарыянскім універсітэце прайшоў форум да 75-годдзя ўстанаўлення афіцыйных ватыканска-японскіх кантактаў.
Ліст да ўдзельнікаў форума скіраваў арцыбіскуп Пол Рычард Галахер, сакратар па адносінах Святога Пасаду з дзяржавамі.
Іерарх прызнаўся, што папа Францішак з’яўляецца вялікім прыхільнікам японскай мудрасці і, будучы духоўным сынам св. Ігнацыя Лаёлы, па-асабліваму адносіцца да Касцёла ў Японіі і Азіі.
Як падкрэсліў іерарх, Святы Пасад будзе працягваць супрацоўнічаць з японскімі ўладамі ў стварэнні сапраўднай культуры міру, асабліва ў цяперашняй няпростай і складанай міжнароднай абстаноўцы.
Арцыбіскуп дадаў, што ватыканская дыпламатыя не перастане дзейнічаць на карысць умацавання міру і раззбраення, супраць усякай спакусы саступіць логіцы зброі і вайны.
«Велізарная колькасць смяротных ахвяр, боль, пакуты і смерць, якія Японія была вымушана перажыць падчас Другой сусветнай вайны, асабліва ў Хірасіме і Нагасакі, служыць пастаянным папярэджаннем чалавецтву», — сказаў ватыканскі іерарх.
Арцыбіскуп Галахер спаслаўся на словы Яна Паўла ІІ падчас яго гістарычнага візіту ў Японію ў 1981 г. і падкрэсліў неабходнасць логікі, у якой вайна ніколі не дапускаецца і не разглядаецца як сродак вырашэння канфліктаў, у якой насілле і нянавісць заўсёды замяняюцца на давер і клопат.
