Сваё 21-е замежнае падарожжа Пантыфік здзейсніць у М’янму і Бангладэш. Падчас візіту ў Святога Айца запланаваны дзве вялікія эўхарыстычныя цэлебрацыі, сустрэчы з біскупамі, духавенствам, моладдзю і прадстаўнікамі органаў улады.
Паездка адбудзецца з 26 лістапада па 2 снежня 2017 г. Зала Друку Святога Пасаду 10 кастрычніка апублікавала афіцыйную праграму 21-га замежнага падарожжа папы Францішка.
Самалёт італьянскай авіякампаніі Alitalia са Святым Айцом на борце вылеціць з Рыма 26 лістапада ў 21.40 і прыбудзе ў міжнародны аэрапорт Янгона на наступны дзень у 13.30 па мясцовым часе — у 8.00 па рымскім часе. Там адбудзецца цырымонія прывітання.
У аўторак, 28 лістапада, Пантыфік адправіцца самалётам мясцовых авіяліній у сталіцу краіны Найп’іда. Пасля афіцыйнага прывітання папа Францішак адправіцца ў Прэзідэнцкі палац на ўрачысты прыём у кіраўніка краіны.
У сераду, 29 лістапада, раніцай у Янгоне Пантыфік узначаліць Эўхарыстыю, у другой палове дня сустрэнецца з Вярхоўнай радай будыйскіх манахаў, а яшчэ праз гадзіну — з біскупамі М’янмы.
30 лістапада раніцай папа Францішак узначаліць святую Імшу з удзелам моладзі ў катэдры Янгона, пасля якой адправіцца ў аэрапорт, адкуль вылеціць у сталіцу Бангладэш.
У Даке Святы Айцец наведае Нацыянальны мемарыял і аддасць даніну памяці шэйху Маджыбуру Рахману. На вечар запланаваны візіт ветлівасці да прэзідэнта краіны і сустрэчы з прадстаўнікамі ўрада, грамадзянскай супольнасці і дыпламатычнага корпуса. Усё гэта будзе праходзіць у Прэзідэнцкім палацы.
1 снежня Папа ўзначаліць Эўхарыстыю з удзелам вернікаў у адным з паркаў сталіцы, падчас якой удзеліць прэзбітэрскае пасвячэнне. У той жа дзень у Апостальскай нунцыятуры папа Францішак прыме прэм’ер-міністра краіны, а затым наведае катэдру і сустрэнецца з мясцовым епіскапатам. Завершыць дзень міжрэлігійная і экуменічная сустрэча ў садзе арцыбіскупскага палаца.
2 снежня Пантыфік наведае з прыватным візітам дом Маці Тэрэзы ў Даке. Затым у Доме Святога Ружанца адбудзецца яго сустрэча з духавенствам, кансэкраванымі асобамі і семінарыстамі. Праз гадзіну папа Францішак наведае могілкі і парафіяльны касцёл Святога Ружанца. Заключным пунктам візіту стане сустрэча з моладдзю. На вечар запланавана афіцыйнае развітанне ў міжнародным аэрапорце ў Даке.
У Рыме Святога Айца будуць чакаць у той жа дзень у 23.00.
