Жанчыны і мужчыны, свецкія і духоўныя ў бела-жоўтых майках з надпісам Athletica Vaticana 17 верасня прымуць удзел у забегу Via Pacis — першым міжрэлігійным паўмарафоне, які распачнецца і завершыцца на плошчы Святога Пятра.
Траса будзе праходзіць праз рымскую сінагогу і мячэць, а таксама храмы вальдэнсаў і праваслаўныя святыні. Утварэнне гэтай зборнай, у якую на сёння ўваходзіць каля 30 працаўнікоў Апостальскай Сталіцы, адобрыў Дзяржаўны сакратарыят. Зборная выступіць пад патранатам Папскай рады па культуры. Дыкастэрыя ўжо падтрымлівае футбольную зборную Ватыкана, а таксама каманду па крыкеце, у якія ўваходзяць слухачы папскіх навучальных устаноў у Рыме.
