«Прыходзяць сумныя навіны пра пераслед нашых братоў з рэлігійнай меншасці рахінджа. Я жадаю выказаць усю сваю салідарнасць з імі», — адзначыў папа Францішак 27 жніўня падчас малітвы «Анёл Панскі» на плошчы Святога Пятра.
«Папросім Пана збавіць іх і паслаць мужчын і жанчын добрай волі ім на дапамогу, каб у поўнай меры прызналі іх правы. Памолімся за братоў рахінджа», — заклікаў Святы Айцец прысутных на плошчы.
Ваенны пераслед мусульманскага народа рахінджа ў М’янме (штат Ракхайн) працягваецца з 2016 года. Мясцовыя ўлады абвінавачваюцца ў шырокамаштабных парушэннях правоў чалавека, уключаючы пазасудовыя пакаранні смерцю, групавое насілле, падпалы і дзетазабойства. Людзі рахінджа з’яўляюцца меншасцю, якая найбольш пераследуецца ў свеце.
