У сераду 31 ліпеня Папа Францішак наведаў парк атракцыёнаў у Остыі, партовым горадзе каля Рыма, дзе сустрэўся з цыркачамі і благаславіў фігуру Маці Божай.
У апошні дзень адпачынку, перш, чым вярнуцца да сваіх працоўных абавязкаў, Святы Айцец нечакана наведаў у прыватнай форме Ostia Summer Park — бясплатны летні фестываль атракцыёнаў і забаваў.
Папа прыбыў каля 15-й гадзіны пры 35-градуснай спякоце ў белым фіяце чынкуэчэнта. Яго прывітала яго даўняя сяброўка, 81-гадова сястра Жэнэўеў Жанінгро з супольнасці меншых сясцёр Езуса.
Ужо больш за паўстагоддзя законніца вядзе душпастырства ў духу Шарля дэ Фуко «ісці туды, куды з цяжкасцю ідзе Касцёл». Менавіта яна — enfant terrible (з фр.; літаральн.: урвіс, пераносн.: чалавек, які ідзе супраць агульнапрынятых правілаў), як жартам назваў яе Папа, арганізавала гэты яго візіт у парк. Святы Айцец бачыць яе кожную сераду напрыканцы агульнай аўдыенцыі, куды пажылая, але жвавая законніца гадамі прыводзіць групы качэўнікаў, артыстаў цырка і асобаў ЛГБТ+.
Прэс-служба Святога Пасаду паведаміла, што ў парку Папа «благаславіў фігуру Маці Божай, заступніцы вандроўных забаў і цырка, а таксама прывітаў прысутныя сем’і і дзяцей».
У знак павагі да Папы было прадастаўлена кароткае шоў клоўнаў і акрабатаў.
Святы Айцец запісаў відэа для хлопчыка Масімо, які здымаў яго на мабільны тэлефон, каб павіншаваць сваю бабулю Лаўру ў якасці падарунка ад унука. Маленькі Оскар падараваў Папу музычны куфэрак, сімвал атракцыёнаў, а таксама ліст і сіні канверт з пяцю еўра: «Каб ты мог купіць сабе марозіва», — сказаў малы.
