Падчас агульнай аўдыенцыі, якая прайшла 6 сакавіка на плошчы Святога Пятра ў Ватыкане, Апостальскі адміністратар для католікаў візантыйскага абраду ў Беларусі архімандрыт Сяргей Гаек уручыў Папу Францішку копію абраза Маці Божай Жыровіцкай.
Як паведаміла Беларуская рэдакцыя парталу Vatican News, архімандрыт Гаек выказаў Святому Айцу падзяку ад беларускіх грэка-католікаў за стварэнне Апостальскай адміністратуры, а таксама павіншаваў яго з адзінаццатай гадавінай абрання на Пасад святога Пятра, якая будзе адзначацца 13 сакавіка.
У якасці дару святар уручыў Папу Францішку паменшаную копію абраза Маці Божай Жыровіцкай, выкананую на мармуры ў адной з мінскіх майстэрняў.
Апостальская адміністратура для католікаў візантыйскага абраду ў Беларусі была створана па рашэнні Папы Францішка 30 сакавіка мінулага года. Апостальскім адміністратарам гэтай касцёльнай структуры быў прызначаны архімандрыт Сяргей Гаек, дагэтуль Апостальскі візітатар для беларускіх грэка-католікаў.
У студзені 2023 года Святы Айцец маліўся перад копіяй абраза Маці Божай Жыровіцкай, якая была выстаўлена падчас агульнай аўдыенцыі ў ватыканскай Зале Паўла VI. Пантыфік прасіў Багародзіцу аб дары міру ва Украіне, дзе таксама шырока вядомы і шанаваны гэтая ікона — першы Марыйны абраз, каранаваны папскімі каронамі на тэрыторыі сучаснай Беларусі (1730 г.).
