Як паведаміла раніцай 26 лютага Прэс-служба Святога Пасаду, былі адменены папскія аўдыенцыі, якія павінны былі адбыцца ў першай палове дня ў панядзелак.
Паводле паведамлення ватыканскай прэс-службы, Папа Францішак мае лёгкія сімптомы захворвання, падобныя на грып, але без павышанай тэмпературы, у сувязі з чым у якасці меры перасцярогі былі адменены ранішнія аўдыенцыі.
Каталіцкае інфармацыйнае агенцтва КАІ нагадала пры гэтым, што Святы Айцец, якому ў снежні споўнілася 87 гадоў, апошнім часам меў праблемы з дыханнем.
Папскія аўдыенцыі былі адменены ўжо ў мінулую суботу.
У снежні Папа Францішак быў вымушаны адмяніць запланаванае падарожжа ў Дубай на канферэнцыю па клімаце, а ў чытанні тэкстаў падчас малітвы Анёл Панскі і агульных аўдыенцый яму тады дапамагалі супрацоўнікі.
З-за праблем з дыханнем ў сакавіку 2023 года Папа быў шпіталізаваны ў клініку імя Агасціно Джэмэллі, а ў чэрвені мінулага года ён перанёс паўторную аперацыю на кішачніку, зробленую праз два гады пасля першай.
