Рэктары і супрацоўнікі санктуарыяў з розных частак свету сабраліся разам у Ватыкане на трохдзённую сустрэчу, арганізаваную Дыкастэрыяй па евангелізацыі ў святле падрыхтоўкі да Юбілею 2025 года.
Як паведамляе Беларуская рэдакцыя парталу Vatican News, Міжнародная канферэнцыя адбываецца ў Зале Паўла VI з 9 па 11 лістапада. У заключны дзень форуму яго ўдзельнікаў прыме на аўдыенцыі Папа Францішак.
Тэма сустрэчы: «Санктуарый — дом малітвы. На шляху да Юбілею 2025».
Яе праграма прадугледжвае шматлікія лекцыі, якія адлюструюць розныя аспекты малітоўнай дзейнасці, магчымай у санктуарыях. Гаворка будзе ісці пра заступніцкую малітву, малітву грэшніка, малітву ў мастацтве, народную малітву. З гэтымі тэмамі пазнаёмяць выкладчыкі папскіх навучальных устаноў Рыма і душпастыры з розных краін.
Кардынал Анджэло Камастры, арцыпрэзбітэр эмэрыт базылікі святога Пятра ў Ватыкане, распавядзе пра тое, як прымаць і праводзіць пілігрымаў, а вядомы кампазітар ксёндз Марко Фрызіна прачытае даклад, прысвечаны малітве музыкай і спевам. Удзельнікі форуму пазнаёмяцца таксама з праектам «Перапіс санктуарыяў у касцёльных рэгіёнах Італіі», які прадставіць прафесар Джусціна Ачэта, выкладчыца Папскага тэалагічнага факультэта Марыянум.
Перад сустрэчай са Святым Айцом, у суботу 11 лістапада, арцыбіскуп Рыно Фізікела, про-прэфект Дыкастэрыі па евангелізацыі, прачытае лекцыю на тэму «Санктуарый на шляху да Юбілею надзеі», а некалькі сведчанняў пазнаёмяць з малітвай у міжнародных санктуарыях. У праграме форуму прадугледжана таксама Імша у ватыканскай базыліцы святога Пятра і канцэрт дзіцячага хору Le Dolci Note.
Міжнародная сустрэча рэктараў і супрацоўнікаў санктуарыяў з розных краін свету адбываецца ў Ватыкане не ўпершыню.
Папярэдні такі форум прайшоў у 2018 годзе. Тады ён быў прысвечаны тэме: «Санктуарый — адчыненыя дзверы для новай евангелізацыі».
