8 жніўня ў Ватыкане была абвешчана тэма 57-а Сусветнага дня міру, які будзе адзначацца 1 студзеня 2024 года.
Як паведаміла Беларуская рэдакцыя парталу Vatican News, тэма папскага паслання з гэтай нагоды будзе гучаць: «Штучны інтэлект і мір».
«Выдатныя дасягненні ў галіне штучнага інтэлекту аказваюць усё больш глыбокі ўплыў на чалавечую дзейнасць, асабістае і грамадскае жыццё чалавека, палітыку і эканоміку», — гаворыцца ў паведамленні Дыкастэрыі па служэнні інтэгральнаму развіццю чалавека.
Папа Францішак заклікае да адкрытага дыялогу аб значэнні гэтых новых тэхналогій, надзеленых разбуральным патэнцыялам. Ён жадае нагадаць пра неабходнасць «быць пільнымі і працаваць над тым, каб пры вытворчасці і выкарыстанні такіх прылад не ўкаранілася логіка гвалту і дыскрымінацыі ў адносінах да найбольш уразлівых і абяздоленых», таму што «несправядлівасць і няроўнасць падсілкоўваюць канфлікты і супрацьстаянне». «Настойлівая неабходнасць адказнага падыходу да канцэпцыі і выкарыстання штучнага інтэлекту з тым, каб ён мог служыць чалавецтву і абароне нашага агульнага дома, патрабуе распаўсюджвання этычных разважанняў на сферу адукацыі і права», — гаворыцца ў паведамленні.
«Абарона годнасці чалавека і клопат пра братэрскія адносіны ўсёй чалавечай сям’і з’яўляюцца неабходнымі ўмовамі для тэхналагічнага развіцця, якое б спрыяла ўсталяванню справядлівасці і міру ва ўсім свеце», — сказана ў паведамленні ватыканскай дыкастэрыі.
