За тры месяцы да Сусветных дзён моладзі, якія пройдуць сёлета з 1 па 6 жніўня ў Лісабоне, Папа Францішак звярнуўся з відэапасланнем да маладых людзей, якія возьмуць у іх удзел.
Як паведамляе Італьянская рэдакцыя парталу Vatican News, невялікае відэа было запісана ў Доме святой Марты, дзе жыве Святы Айцец, дапаможным біскупам Лісабона Амэрыку Мануэлем Алвэшам Агіярам, якога Папа прыняў 27 красавіка.
«Уяўляю сабе, што можа быць у вашых думках: як гэта зрабіць, як атрымаць вызваленне на працы ці ў навучальнай установе, як знайсці неабходныя на дарогу сродкі… Шмат перажыванняў, але заўсёды з позіркам, скіраваным на гэты гарызонт, на гэтую надзею», — сказаў Папа.
«Удзел у Днях — прыгожая справа, і калі хтосьці гэта адчуе, жадае стаць удзельнікам гэтай падзеі. Падрыхтуйцеся з такім жаданнем, дадайце да гэтага надзею; надзею, бо на такіх Днях, як гэтыя, вельмі расцеш. Не заўважаем гэтага, але ўнутры нас застаюцца рэчы, застаюцца ўнутры каштоўнасці, якія мы адкрылі, адносіны, якія ўсталявалі з іншымі маладымі людзьмі з розных краін, сустрэчы… Усё застаецца ўнутры, і перадусім відаць сілу моладзі. Касцёл мае сілу моладзі. Таму ідзіце наперад», — заахвоціў Папа.
На заканчэнне Святы Айцец даў параду адносна таго, як лепш падрыхтавацца да СДМ.
«Перадусім адзін сакрэт: каб добра падрыхтавацца, варта паглядзець на свае карані, паспрабаваць сустрэцца са старэйшымі. Многія з вас маюць дзядуляў і бабуль, наведайце іх і запытайцеся: „А ў ваш час былі Дні моладзі?“ — „Не“, — дакладна адкажуць яны вам. „А што, на тваю думку, мне трэба зрабіць?“…
Паразмаўляйце крыху з дзядулямі і бабулямі. Яны дадуць вам мудрасць. А вы заўсёды ідзіце наперад. Буду чакаць вас у Лісабоне. Пакуль!» — сказаў на развітанне Папа Францішак.
