Кардынал Жан-Клод Ольрыш не чакае адстаўкі Папы Францішка і тлумачыць, чаму Святы Айцец не збіраецца сыходзіць на пенсію.
«Ён сыдзе ў адстаўку толькі тады, калі працяг папскага служэння стане для яго сапраўды немагчымым», — цытуе Беларуская рэдакцыя парталу Vatican News словы іерарха з інтэрв’ю, якое ён даў італьянскай газеце La Stampa.
Арцыбіскуп Люксембуржскі падкрэсліў, што «Святы Айцец моцны, мужны, настойлівы, у яго моцная воля і шмат надзеі».
Спекуляцыі наконт магчымай адстаўкі Папы Францішка, якія ўжо абвяргаліся раней, зноў пачалі з’яўляцца пасля таго, як 29 сакавіка Пантыфік быў дастаўлены ў клініку імя Агасціно Джэмэллі ў Рыме. Прычынай шпіталізацыі 86-гадовага Пантыфіка стаў бранхіт, які лячылі антыбіётыкамі. Святому Айцу стала лепш, і 1 красавіка раніцай ён пакінуў шпіталь.
