Святы Айцец правёў некалькі хвілін у малітве за мір ва Украіне перад копіяй іконы Маці Божай Жыровіцкай, якая падчас агульнай аўдыенцыі 11 студзеня была выстаўлена ў ватыканскай Зале Паўла VI.
Пра гэта паведаміла Беларуская рэдакцыя парталу Vatican News.
«Не будзем забываць пра змучаную Украіну, якая заўсёды ў нашых сэрцах; выкажам гэтаму народу, які перажывае жорсткія пакуты, нашую любоў, нашую блізкасць і нашую малітву.
А зараз я правяду некалькі хвілін у цішыні, молячыся за гэтую дарагую краіну і за мір, перад іконай Багародзіцы Народа, якая ўшаноўваецца ў Беларусі. Запрашаю вас духоўна далучыцца да маёй малітвы», — сказаў Папа Францішак.
Пасля гэтага Святы Айцец падышоў да копіі іконы Маці Божай Жыровіцкай, якую беларускія грэка-католікі ўшаноўваюць як Валадарку Беларускага Народа. Гэты абраз — першая каранаваная папскімі каронамі ікона Багародзіцы на тэрыторыі сучаснай Беларусі — дарагі таксама ўкраінскім вернікам. Яе копія у выглядзе фрэскі змешчана ў рымскім касцёле святога Сяргея і Вакха, катэдральным саборы Апостальскага экзархата для ўкраінскіх грэка-католікаў у Італіі.
