У канцы мая, месяца, асаблівым чынам прысвечанага ў Касцёле Найсвяцейшай Панне Марыі, Папа Францішак будзе маліцца ў інтэнцыі міру, а таксама за тых, хто пакутуе ад канфлікту ва Украіне і іншых ваенных канфліктаў.
Як паведаміла Беларуская рэдакцыя парталу Vatican News, 31 мая а 18-й гадзіне (па цэнтральнаеўрапейскім часе) Святы Айцец узначаліць малітву на Ружанцы перад фігурай Марыі Каралевы супакою (Regina pacis) ў рымскай базыліцы святой Марыі Вялікай (Санта-Марыя-Маджорэ).
Да набажэнства праз тэлемост далучацца шматлікія санктуарыі ва ўсім свеце, у тым ліку і ў тых краінах, дзе ідуць войны або існуе палітычная нестабільнасць.
У рымскай базыліцы разам з Папам Ружанец будуць маліцца ўкраінскія сям’і, людзі, звязаныя з ахвярамі вайны, вайсковыя капэланы, дзеці і падлеткі, якія прынялі Першую святую Камунію і канфірмацыю, скаўты.
Фігура Марыі Каралевы супакою была ўсталявана па ініцыятыве Бэнэдыкта XV, каб прасіць Найсвяцейшую Панну аб спыненні Першай сусветнай вайны.
