Ватыканская Дыкастэрыя па служэнні інтэгральнаму развіццю чалавека 18 студзеня распаўсюдзіла інфармацыю аб рашэнні Папы Францішка фінансава дапамагчы мігрантам на беларуска-польскай граніцы.
Як паведамляе Беларуская рэдакцыя парталу Vatican News, у афіцыйнай заяве Дыкастэрыі гаворыцца, што Святы Айцец вырашыў накіраваць унёсак у памеры 100 тысяч еўра на карысць груп мігрантаў, якія апынуліся паміж Польшчай і Беларуссю, а таксама ў дапамогу Caritas Польшча для вырашэння надзвычайнай міграцыйнай сітуацыі на граніцы паміж дзвюмя краінамі.
Святы Айцец вырашыў таксама накіраваць першы ўнёсак у памеры 100 тысяч еўра на дапамогу насельніцтву Філіпін пасля тайфуну, які закрануў, паводле крыніц Арганізацыі Аб’яднаных Нацый, каля 8 мільёнаў чалавек у 11 рэгіёнах краіны.
