16 мая, калі ў Італіі і некаторых іншых краінах свету адзначаецца ўрачыстасць Унебаўшэсця Пана, Папа Францішак засяродзіўся на евангельскім урыўку пра апошнюю сустрэчу ўваскрослага Езуса з вучнямі, пасля якой Ён узышоў да Айца.
Нягледзячы на расстанне з Панам, вучні не выглядалі няўцешнымі. Наадварот, яны былі радаснымі і гатовымі вырушыць у свет як місіянеры. На гэта звярнуў увагу Пантыфік перад малітвай «Уладарка Неба» з вернікамі, якія сабраліся на плошчы Святога Пятра ў Ватыкане.
«Чаму ж вучні не былі смутнымі? Чаму таксама мы павінны радавацца, калі бачым, як Езус узыходзіць на неба?» — цытуе Папу Францішка Беларуская рэдакцыя парталу Vatican News. Адказваючы на гэтае пытанне, Святы Айцец падкрэсліў, што ўнебаўшэсце было завяршэннем «місіі Езуса сярод нас».
«Калі ж Езус сышоў з неба дзеля нас, то таксама дзеля нас Ён узыходзіць», узносячы з сабой нашае чалавечае цела. «У гэтай таямніцы кожны з нас сузірае ўласнае будучае прызначэнне», — дадаў Пантыфік.
Першая прычына для радасці, якую нясе ўнебаўшэсце, заключаецца ў тым, што Езус не пакінуў нас, а застаўся з намі ў малітве: Ён моліцца да Айца, паказваючы Яму свае раны. Як сцвердзіў Святы Айцец, гэта павінна напаўняць веруючага адчуваннем бяспекі і вялікай радасці. Другая прычына — абяцанне Езуса «аб спасланні Святога Духа, які вядзе нас у свет, каб абвяшчалі Евангелле».
«Дарагія браты і сёстры, ва ўрачыстасць Унебаўшэсця, сузіраючы неба, куды ўзышоў Хрыстус і дзе сядзіць праваруч Айца, будзем прасіць Марыю, каб дапамагала нам быць адважнымі сведкамі Уваскрослага ў свеце ў канкрэтных жыццёвых сітуацыях», — завяршыў нядзельнае разважанне Святы Айцец.
