Папа Францішак пажадаў вернікам плённага перыяду Адвэнту, заклікаючы заставацца пераканаўчымі сведкамі збаўчай праўды Хрыста. 29 лістапада ў Касцёле — Першая нядзеля Адвэнту.
Словы Пантыфіка прыводзіць беларуская рэдакцыя парталу Vatican News. «Праз некалькі дзён распачнецца Адвэнт. Радаснае чаканне прыйсця Збаўцы, які стаў чалавекам, падобным да нас, няхай напоўніць сэрцы надзеяй і мірам. Няхай Найсвяцейшая Панна Марыя, якую будзеце ўшаноўваць у вашых касцёлах, цэлебруючы Рараты, суправаджае вас на шляху да Нараджэння Божага Сына», — сказаў Папа на заканчэнне агульнай аўдыенцыі 25 лістапада.
Пантыфік нагадаў пра ўрачыстасць Хрыста Валадара Сусвету, якая адзначалася ў мінулую нядзелю.
Па яго словах, яна дапамагае ўсвядоміць, што «Хрыстус вызваліў нас ад улады цемры, каб увесці ў сваё Валадарства і зрабіць пераканаўчымі сведкамі збаўчай праўды».
«Хрыстус, які валадарыць з крыжа, няхай суцяшае вас у хвіліны выпрабаванняў і пакут, адкрываючы сэрцы кожнага на надзею», — сказаў Святы Айцец.
