У гэтым годзе літургія Божага Нараджэння, цэлебрацыю якой узначаліць Папа Францішак, пройдзе ў Ватыкане без удзелу вернікаў.
Пра гэта са спасылкай на CNA паведамляе Каталіцкае інфармацыйнае агенцтва КАІ, зазначаючы, што прычынай з’яўляецца крызіс, звязаны з пандэміяй каранавірусу.
CNA спасылаецца на ліст Дзяржаўнага Сакратарыяту пасольствам, акрэдытаваным пры Апостальскай Сталіцы. У ім гаворыцца, што Папа Францішак будзе цэлебраваць літургію Божага Нараджэння ў Ватыкане «ў прыватнай форме, без прысутнасці членаў дыпламатычнага корпусу».
Таксама ў гэтым лісце, высланым 22 кастрычніка, паведамляецца, што літургія будзе транслявацца анлайн.
Дыпламаты, акрэдытаваныя пры Апостальскай Сталіцы, звычайна ўдзельнічаюць у папскіх літургіях як спецыяльныя госці. Нагадваецца, што ў падобнай форме адбываліся і набажэнствы Вялікага тыдня ў гэтым годзе.
У Італіі ў апошнія тыдні рэзка павялічылася колькасць захворванняў на COVID-19, а таксама колькасць шпіталізаваных і выпадкаў смерці, што вымусіла ўрад прыняць новыя прафілактычныя меры, уключаючы поўнае закрыццё спартыўных залаў і тэатраў, а ў 18 гадзін — бараў і рэстаранаў.
У апошнія гады Папа цэлебраваў 12 снежня Імшу ва ўспамін Маці Божай Гвадэлупскай, а 8 снежня, ва ўрачыстасць Беззаганнага Зачацця Найсвяцейшай Панны Марыі, на плошчы Іспаніі ў Рыме ўскладаў вянок перад Калонай Марыі Беззаганнай.
Звычайна вечарам 24 снежня, у вігілію, Папа цэлебруе традыцыйную Пастэрку, а апоўдні ў першы дзень Нараджэння Пана ўдзяляе ўрачыстае благаслаўленне Urbi et Orbi з цэнтральнай лоджыі базылікі св. Пятра.
У мінулыя гады з яго ўдзелам праходзілі таксама Нешпары 31 снежня, a ва ўрачыстасць святой Багародзіцы Марыі, 1 студзеня — Імша ў ватыканскай базыліцы.
