Фота: АР
Святы Айцец выказаў сваю падтрымку перамір’ю паміж Арменіяй і Азербайджанам. Пра гэта ён заявіў падчас сустрэчы з вернікамі на малітве «Анёл Панскі», якая 11 кастрычніка прайшла ў Ватыкане.
«Я з радасцю прыняў той факт, што Арменія і Азербайджан дамовіліся аб спыненні агню па гуманітарных прычынах з думкай пра дасягненне грунтоўнага мірнага пагаднення», — сказаў Папа Францішак, чые словы перадае беларуская рэдакцыя парталу Vatican News.
«Нягледзячы на тое, што перамір’е здаецца вельмі хісткім, я заклікаю да яго аднаўлення і выказваю мае спачуванні ў сувязі з гібеллю і пакутамі людзей, разбурэннямі дамоў і месцаў культу. Малюся і запрашаю маліцца за ахвяраў і ўсіх тых, чыё жыццё знаходзіцца ў небяспецы», — дадаў пастыр паўсюднага Касцёла.
