Падчас сустрэчы з вернікамі на малітве «Анёл Панскі», якая 12 ліпеня прайшла ў Ватыкане, Пантыфік пракаментаваў рашэнне аб змене статусу сабора святой Сафіі ў Стамбуле.
Як паведамляе беларуская рэдакцыя парталу Vatican News, Папа нагадаў, што ў другую нядзелю ліпеня адзначаецца Міжнародны дзень мора. Ён прывітаў усіх працаўнікоў марской сферы, асабліва тых, хто знаходзіцца далёка ад сваіх блізкіх і сваёй краіны.
«Мора скіроўвае мае думкі далёка, у Стамбул. Я думаю пра сабор святой Сафіі, і я вельмі засмучаны», — сказаў пастыр паўсюднага Касцёла.
10 ліпеня Дзяржсавет Турцыі адмяніў рашэнне ўраду краіны ад 1934 г. аб змене статусу сабора св. Сафіі ў Стамбуле — тады ён з мячэці ператварыўся ў музей.
Цяпер ён зноў будзе выкарыстоўвацца як мусульманская святыня.
Сабор св. Сафіі быў пабудаваны ў 537 г. На працягу дзевяці стагоддзяў ён лічыўся адным з самых вялікіх храмаў у свеце, а пасля заваявання горада туркамі стаў галоўнай мячэццю асманскай дзяржавы. У 1934 г. атрымаў статус музея, а ў 1985 г. быў прызнаны помнікам сусветнай спадчыны ЮНЕСКА.
