Папа заклікаў католікаў ва ўсім свеце з 16 па 24 мая ўзяць удзел у экалагічнай ініцыятыве Тыдзень Laudato si’, прымеркаванай да пяцігоддзя публікацыі яго аднайменнай энцыклікі.
«Які свет мы жадаем пакінуць тым, хто прыйдзе пасля нас, падрастаючаму пакаленню?» — кіруючыся гэтым пытаннем, Папа вырашыў абвясціць аб правядзенні акцыі, далучыцца да якой запрашаюцца каталіцкія парафіі, манаскія супольнасці, дыяцэзіі, навучальныя ўстановы і іншыя структуры, інфармуе беларуская рэдакцыя парталу Vatican News.
«Гэта будзе сусветная кампанія з нагоды пяцігоддзя энцыклікі Laudato si’, прысвечаная клопату пра супольны дом. У чарговы раз заклікаю неадкладна адказаць на экалагічны крызіс, на плач зямлі і бедных, якія больш не могуць чакаць.
Будзем жа клапаціцца пра стварэнне, дар нашага добрага Бога Стварыцеля! Адзначым разам Тыдзень Laudato si’!» — сказаў Святы Айцец у сваім спецыяльным відэапасланні.
Ініцыятыва пройдзе пад патранатам Дыкастэрыі па служэнні інтэгральнаму развіццю чалавека. У яе межах каталіцкія супольнасці закліканы прааналізаваць свае дзеянні на карысць аховы навакольнага асяроддзя і зрабіць наступныя крокі ў гэтым кірунку.
Рэкамендацыі і матэрыялы для арганізацыі Тыдня змешчаны на шматмоўным рэсурсе Laudatosiweek.org.
