18 мая ў Навагрyдку прайшоў IV Фестываль сям’і, арганізаваны парафіяй cвятога Міхала Арханёла. Як і ў мінулыя гады, фестываль сабраў шмат сем’яў рознага веравызнання і стаў для навагрудчан сапраўдным святам.
Перад пачаткам фестывалю ў касцёле святога Міхала Арханёла адбылася святочная Імша ў інтэнцыі сем’яў. Потым у суправаджэнні аркестра і дзіцячага ансамбля «Жавароначкі» ўсе прысутныя прайшлі ад плошчы да гарадскога парку, дзе адбылася асноўная частка фестывалю. Шэсце сем’яў — добрая і яркая фестывальная традыцыя.
На пачатку вялікай святочнай праграмы ўдзельнікаў прывіталі прадстаўнік мясцовай улады і пробашч парафіі святога Міхала Арханёла ксёндз Юрый Жэгарын, які адзначыў, што здаровая хрысціянская сям’я — моцны падмурак нашага грамадства і адзіны шлях, каб збудаваць будучыню для наступных пакаленняў.
Як сказаў кс. Юрый Жэгарын, яму вельмі прыемна бачыць на фестывалі шмат сем’яў — не толькі каталіцкіх — і тое, што фестываль выйшаў ужо за межы парафіі. У гэтым годзе актыўны ўдзел у ім прымалі сем’і з парафіі ў Стоўбцах.
У праграме былі сямейныя і дзіцячыя конкурсы, выступленне дзіцячага калектыву «Жавароначкі», малюнкі на асфальце, турыстычная пляцоўка, спартовыя эстафеты і многае іншае.
Парк быў напоўнены дзіцячым гоманам, смехам і радасцю. Дзеці і дарослыя гулялі, спявалі, малявалі і проста весяліліся ад душы. Усе ўдзельнікі гульняў і конкурсаў атрымалі падарункі і памятныя сувеніры. На працягу мерапрыемства прысутных забаўлялі роставыя лялькі, працавалі атракцыёны.
У межах свята прайшло адразу некалькі конкурсаў. Самым смачным стаў традыцыйны конкурс хатняй выпечкі, удзел у якім прынялі рэкордныя 32 працы.
Свае вакальныя, танцавальныя і іншыя таленты сем’і прадэманстравалі падчас творчага конкурсу.
Усе ўдзельнікі падарылі шмат радасных хвілін журы і гледачам.
