9 мая многія вернікі Каталіцкага Касцёла на Беларусі ўшаноўваюць памяць ахвяраў і моляцца за ўсіх палеглых у жудаснай бойні Другой сусветнай вайны.
Дзень Перамогі — гэта перадусім дзень памяці, якую неабходна захаваць і перадаць наступным пакаленням, каб больш ніколі не дапусціць жудасцяў вайны на роднай зямлі. У гэты дзень вернікі ўзносяць малітвы аб міры, а таксама ўспамінаюць усіх тых, хто аддаў сваё жыццё ў змаганні з нялюдскім нацызмам, што прынёс столькі болю і пакут не толькі роднай Беларусі, але і ўсім народам Еўропы.
Памятныя мерапрыемствы праходзяць у гарадах, мястэчках і вёсках, і шмат дзе ў іх бяруць удзел прадстаўнікі каталіцкага духавенства.
У г.п. Свір Мядзельскага раёна Мінскай вобласці па запрашэнні мясцовай улады ў памятным мерапрыемстве, што прайшло каля помніка ахвярам Другой сусветнай вайны, узяў удзел дэкан Мядзельскі кс. канонік Багуслаў Маджэеўскі. Разам са сваімі парафіянамі ён усклаў кветкі да помніка на Свірскай горцы, а таксама ўзначаліў цэлебрацыю св. Імшы ў касцёле св. Мікалая, біскупа, у якой маліўся аб міры і аб вечным жыцці для ахвяраў вайны.
У сталіцы нашай краіны на мемарыяльным мерапрыемстве з удзелам прэзідэнта Аляксандра Лукашэнкі Каталіцкі Касцёл прадставілі Апостальскі нунцый у Беларусі арцыбіскуп Габар Пінтэр, а таксама Генеральны вікарый Мінска-Магілёўскай архідыяцэзіі біскуп Юрый Касабуцкі і кс. канонік Францішак Рудзь, пробашч мінскай парафіі Маці Божай Будслаўскай.
Разам з іншымі ўдзельнікамі мерапрыемства, сярод якіх былі таксама прадстаўнікі Беларускай Праваслаўнай Царквы на чале з Мітрапалітам Мінскім і Заслаўскім Паўлам, яны ўсклалі кветкі да манумента на плошчы Перамогі ў Мінску.
