У Вялікі чацвер увечары ў мінскім катэдральным касцёле Найсвяцейшага Імя Марыі адбылася св. Імша Вячэры Пана, цэлебрацыю якой узначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.
Напачатку сабраных у святыні шматлікіх вернікаў прывітаў арцыбіскуп Тадэвуш Кандрусевіч, Мітрапаліт Мінска-Магілёўскі. Іерарх заахвоціў іх глыбей засяродзіцца на значэнні Эўхарыстыі ў жыцці хрысціяніна і належным чынам перажыць таямніцу ўстанаўлення Найсвяцейшага Сакрамэнту алтара.
Вялікі чацвер — гэта дзень, калі Касцёл у літургіі ўзгадвае Апошнюю вячэру Хрыста з Ягонымі вучнямі, падчас якой Ён абмыў ім ногі і, падаўшы ім хлеб і віно, наказаў і надалей рабіць гэта ў памяць пра Яго.
Такім чынам быў устаноўлены сакрамэнт Эўхарыстыі, у якім хлеб і віно перамяняюцца ў Цела і Кроў Збаўцы, прынесеные Ім у ахвяру на Крыжы.
На пачатку св. Імшы Вячэры Пана адбыўся абрад абмыцця ног. Біскуп Юрый Касабуцкі разам з пробашчам мінскай катэдральнай парафіі кс. канонікам Антоніем Клімантовічам абмылі ногі дванаццаці выбраным сярод вернікаў мужчынам.
У прамоўленым Божым слове іерарх паўней раскрыў сэнс таго, што ўчыніў Езус Хрыстус, абмываючы ногі апосталам.
«Абмыццё ног вучням было пакорным сведчаннем самаахвярнай любові Хрыста да братоў і Яго поўнай паслухмянасці волі Айца. Найвышэйшаю праяваю гэтай любові стала крыжовая ахвяра Збаўцы, якая актуалізуецца кожны раз падчас святой Імшы, калі хлеб і віно ў руках святара зноў становяцца сапраўднымі Целам і Крывёю Хрыста», — сказаў біскуп Юрый Касабуцкі.
Імша Вячэры Пана — гэта не толькі ўспамін устанаўлення Эўхарыстыі, але таксама пачатак святога Пасхальнага Трыдуума, калі Касцёл нанава перажывае здраду, арышт, муку і смерць свайго Пана, якія папярэднічалі Яго хвалебнаму Уваскрасенню. Таму падчас гэтай Імшы змоўклі арганы і званы, а Эўхарыстычнае Цела Хрыста было перанесена ў сімвалічную цямніцу. У цішыні вернікі кленчылі перад ёю, каб ушанаваць жывога Хрыста, прысутнага ў Найсвяцейшым Сакрамэнце.
