30 сакавіка ў касцёле Узвышэння Святога Крыжа ў Баранавічах адбылася штогадовая сустрэча малітоўных груп «Маці ў малітве», якая аб’яднала ўдзельніц з Пінскай дыяцэзіі.
Мерапрыемства праходзіла ў фармаце дня духоўных разважанняў. Мамы з розных парафій супольна маліліся за сваіх дзяцей, удзельнічалі ў Эўхарыстыі і пад кіраўніцтвам ксяндза Юрыя Дразда, дырэктара Катэхетычнага каледжа ў Баранавічах, разважалі над Божым словам.
Зыходзячы з таго, што 2019 год абвешчаны ў Касцёле на Беларусі Годам сям’і, асноўная ўвага ў разважаннях была звернута на прыклад Марыі як клапатлівай маці, гаспадыні і жанчыны глыбокай веры.
Падчас супольнага пасілку і перапынкаў на каву прысутныя мелі магчымасць падзяліцца сваімі думкамі і пачуццямі ў цёплай нефармальнай атмасферы.
