20 снежня святары і кансэкраваныя асобы сабраліся ў парафіі Найсвяцейшага Сэрца Езуса ў Наваполацку, каб супольна памаліцца і павіншаваць адно аднаго з надыходзячымі Калядамі.
Як паведамляе онлайн-версія газеты Віцебскай дыяцэзіі «Каталіцкі Веснік» Catholicnews.by, падчас адарацыі духавенства і кансэкраваныя асобы маглі ў цішыні прадставіць Езусу свае клопаты і парафіяльныя справы, а таксама скарыстаць з магчымасці споведзі.
Святую Імшу цэлебраваў біскуп Віцебскі Алег Буткевіч. У гэтай Эўхарыстыі пастыр мясцовага Касцёла асаблівым чынам маліўся аб тым, каб кожнае намаганне святароў і кансэкраваных асобаў прыносіла духоўную карысць людзям, а таксама ўмацоўвала іх асабістую сувязь з Богам.
Прамаўляючы Божае слова, біскуп Алег засяродзіў увагу на тэме Божай любові да кожнага чалавека, якой святары вучаць сваіх парафіянаў.
«Любоў Божая не меншая з-за таго, што я чалавек недасканалы і, можа, штосьці раблю не так, як павінен. Яна заўсёды аднолькавая — бязмежная, такая, што калісьці Божага Сына прывяла на крыж. <…>
Пастараемся сёння, дзелячыся аплаткай, абудзіць у сабе такое пачуцце да іншага чалавека, што гэта сапраўды мой брат, мой сябра; гэта той, каго любіць Бог, а таму і з майго боку павінна быць прынамсі прабачэнне і добразычлівасць да гэтага чалавека», — пажадаў іерарх.
Пасля св. Імшы адбылася кароткая сустрэча, падчас якой біскуп Алег шчыра прывітаў у Віцебскай дыяцэзіі новых працаўнікоў на ніве Пана: а. Алега Вайцяховіча OFMCap (Докшыцы), с. Марыю Пію Трапачову CR (Наваполацк) і с. Ігнацыю Чаеўскую MSF (Параф’янава), пажадаўшы ім плённага служэння ў парафіях, а канцлер кс. Віктар Місевіч пазнаёміў прысутных з запланаванымі падзеямі на надыходзячы 2019 год.
Пасля святары, законныя сёстры, журналісты і біскуп дзяліліся аплаткай і выказвалі адно аднаму шчырыя пажаданні.
