Пошук


17.12.2018 12:03   Тэрэса Клімовіч / Фота: Ганна Абаева / Catholic.by

15 снежня ў Мінскім тэалагічным каледжы імя св. Яна Хрысціцеля адбылася аплаткавая сустрэча навучэнцаў і выкладчыкаў з дапаможным біскупам Мінска-Магілёўскай архідыяцэзіі Юрыем Касабуцкім.

На пачатак сустрэчы сабраныя прынялі ўдзел у святой Імшы, якую цэлебраваў біскуп Юрый Касабуцкі ў капліцы пры Хрысціянскім сацыяльным цэнтры «Місіі добрага самараніна пад апекай св. Уршулі Ледухоўскай».

У сваёй гаміліі іерарх звярнуў увагу навучэнцаў на важнасць сталага і сумленнага паглыблення ведаў для кожнага веруючага чалавека, каб мець магчымасць адказаць на тое важнае пытанне пра веру, якое нам могуць задаць. Вядома, што не ўсе з іх будуць весці катэхетычныя заняткі ў парафіях, але ў сваім асяроддзі змогуць растлумачыць людзям некаторыя рэчы. Біскуп адзначыў, што, «калі спытацца ў людзей, ці чулі яны імя Езус Хрыстус, то ўсе адкажуць “Так!”, але калі спытацца, хто гэта, то многія не змогуць адказаць, хто Ён і што зрабіў».

Пасля благаслаўлення аплатак і радаснага моманту дзялення імі, абмену пажаданнямі і цёплымі словамі ўдзячнасці навучэнцы другога курсу запрасілі ўсіх прысутных паглядзець батлейку — лялечнае прадстаўленне на распаўсюджаны ў даўнія часы сюжэт пра караля Ірада. Персанажы батлейкі яскрава прадэманстравалі важнасць правільнага выбару ў жыцці не толькі караля, але і кожнага чалавека, і катастрафічныя наступствы паслухмянасці падшэптам злога духа.

Салодкім і прыемным заканчэннем сустрэчы сталі прысмакі, спечаныя і прыгатаваныя самімі студэнтамі тэалагічнага каледжа. Да кожнага рэцэпта, несумненна, былі дададзеныя цеплыня і любоў, якія адчуваліся на смак і сталі цудоўным напамінам, што свята Божага Нараджэння зусім блізка.

На развітанне біскуп Юрый Касабуцкі падзякаваў за сустрэчу і благаславіў усіх прысутных.

 

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.