Пасля перамогі на дзіцячым конкурсе песні «Еўрабачанне 2018», які 25 лістапада прайшоў у Мінску, польская ўдзельніца Раксана Вэнгель падзякавала Богу.
13-гадовая полька спявала песню Anyone I Want to Be, словы якой — часткова на англійскай, часткова на польскай мове. Па выніках конкурсу яна была прызнана лепшай з 20 удзельнікаў конкурсу з розных краін.
Пасля абвяшчэння вынікаў конкурсу спявачка-падлетак сказала:
«Мая песня кажа пра тое, што самае галоўнае — гэта мары, якія кожнаму могуць дапамагчы дасягнуць усяго.
Я хачу падзякаваць Польшчы, усёй Еўропе, маім танцоркам, сям’і, сябрам і Богу.
Дзякую таксама Беларусі за арганізацыю конкурсу».
Фінальны канцэрт дзіцячага конкурсу песні «Еўрабачанне 2018» прайшоў у Мінск-арэне, дзе сабралася больш за 15 тыс. гледачоў. Пераможца быў вызначаны на падставе галасавання членаў журы, а таксама галасавання ў інтэрнэце. Сёлета ў конкурсе выступіла рэкордная колькасць удзельнікаў — прадстаўнікі 20 розных краін ва ўзросце ад 9 да 15 гадоў. Ужо ў другі раз фінал дзіцячага конкурсу песні «Еўрабачання» прайшоў у Мінску, а Польшча перамагла ў ім упершыню.
