25 лістапада ва ўрачыстасць Езуса Хрыста, Валадара Сусвету, якая лічыцца таксама «нядзеляй пакліканняў», семінарысты і выхавацелі Міждыяцэзіяльнай Вышэйшай духоўнай семінарыі ў Гродне наведвалі парафіі дыяцэзіі.
Асноўная мэта такіх выездаў — супольная малітва разам з вернікамі, а таксама сведчанні аб пакліканні і дзейнасці семінарыі, а таксама падзяка за ахвяраванні і малітвы ў інтэнцыі пакліканняў.
Семінарыйны музычны гурт AVE разам з рэктарам кс. Віталем Вайцяхоўскім наведаў парафіяльную супольнасць у Цудзенішках (Ашмянскі дэканат).
Семінарысты падрыхтавалі разважанні для адарацыі Найсвяцейшага Сакрамэнту, падчас якой маліліся разам з парафіяй аб святарскіх і манаскіх пакліканнях. Святую Імшу ўзначаліў рэктар Міждыяцэзіяльнай Вышэйшай духоўнай семінарыі ў Гродне кс. Віталій Вайцяхоўскі.
Падчас Імшы быў прачытаны ліст Канферэнцыі Каталіцкіх біскупаў Беларусі на нядзелю Хрыста Валадара. На заканчэнне ўрачыстасці адбыўся музычны канцэрт гурта AVE.
