2–4 лістапада ў Шчучыне прайшлі Піярскія дні моладзі. На сустрэчу з Богам і бліжнім прыбыло каля 60 маладых людзей з піярскіх парафій Ліды і Шчучына.
Дэвізам ПДМ сталі словы «Бог — наш Айцец, і хваліць Яго проста».
Усе канферэнцыі ў межах сустрэчы былі звязаны з Асобай Бога Айца, якога ўдзельнікі яшчэ больш пазнавалі як любячага Тату, міласэрнага і ласкавага.
Акрамя падрыхтаваных айцамі піярамі разважанняў на гэтую тэму, моладзь праз працу ў групах спрабавала сама акрэсліць, які ёсць наш Нябесны Айцец, разважаючы над сямю просьбамі малітвы Панскай.
Моладзь мела магчымасць асабістай сустрэчы з Богам Айцом у адарацыі Найсвяцейшага Сакрамэнту, Набажэнстве Святла і аднаўленні абяцанняў хросту, а таксама падчас супольнай Эўхарыстыі.
У праграме быў час і на тое, каб юнакі і дзяўчаты бліжэй пазнаёмілася паміж сабою праз розныя інтэграцыйныя гульні, забавы і танцы.
Айцы піяры спадзяюцца, што сёлетнія Піярскія дні моладзі прынясуць багаты духоўны плён у жыцці кожнага ўдзельніка.
