Увечары 12 кастрычніка ў нацыянальным санктуарыі Маці Божай Будслаўскай распачалася малітоўная сустрэча моладзі ў інтэнцыі Сіноду Біскупаў, у якой бяруць удзел каля сотні юнакоў і дзяўчат.
На пачатку сустрэчы перад цудатворным абразом Маці Божай у будслаўскай святыні цэлебрацыю св. Імшой за біскупаў, сабраных у Рыме на Сінод на тэму «Моладзь вера і распазнанне паклікання», узначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.
Вітаючы прысутных, іерарх адзначыў, што быў прыемна здзіўлены такой вялікай колькасцю ўдзельнікаў малітоўнай сустрэчы.
У прывітальным слове і прамоўленай падчас Імшы гаміліі ён растлумачыў асноўныя мэты і заданні Сіноду Біскупаў, а таксама падкрэсліў важную ролю, якую моладзь паклікана адыгрываць у Касцёле і ў грамадстве.
Арганізатарам моладзевай малітвы ў інтэнцыі Сіноду Біскупаў, які цяпер праходзіць у Рыме, выступіла парафія ў Будславе на чале з яе пробашчам кс. Дзміітрыем Дубовікам.
Пасля св. Імшы гасцінныя гаспадары пачаставалі ўдзельнікаў сустрэчы смачнай вячэрай, пасля чаго юнакі і дзяўчаты вярнуліся ў святыню, да цудадзейнага абраза Маці Божай, дзе пачулі канферэнцыю, падрыхтаваную для іх кс. Паўлам Тронам, і да поўначы застануцца на адарацыі ў інтэнцыі Сіноду Біскупаў.
