Сёлета споўнілася 80 гадоў, як адышла ў вечнасць св. Фаўстына Кавальская. З гэтай нагоды ў мінскай парафіі святых Сымона і Алены (Чырвоны касцёл) 7 кастрычніка прайшла св. Імша, а таксама сустрэча з манахіняй Канстанцыяй з Паставаў.
Пасля Імшы вернікі ўшанавалі рэліквіі святой Фаўстыны.
На сустрэчы быў прадстаўлены жыццёвы і духоўны шлях святой, абранай Божым Провідам, каб стаць вястункай Яго Міласэрнасці.
Сястра Канстанцыя таксама падзялілася сведчаннем пра цуды, якія здзяйсняе Бог пасля малітваў, скіраваных да св. Фаўстыны, паказваючы, што ўшанаванне Божай Міласэрнасці прыносіць духоўны плён.
Прысутныя акунуліся ў час, калі жыла св. Фаўстына, у яе давер Міласэрнаму Езусу, які паказвае кожнаму сваю вялікую любоў.
Завяршыла сустрэчу малітва Вяночка да Божай Міласэрнасці. Акрамя таго, манахіня Канстанцыя расказала пра неабходныя сакрамэнты пакаяння і Эўхарыстыі і пра тое, якую ролю яны адыгрывалі ў жыцці св. Фаўстыны.
