7 кастрычніка біскуп Гродзенскі Аляксандр Кашкевіч асвяціў адноўленую капліцу на могілках у парафіі св. Яна Хрысціцеля ў Воўпе (Мастоўскі дэканат).
Асвячэнне адбылося на заканчэнне сёлетняй адпустовай урачыстасці ў гонар Маці Божай Ружанцовай і ў дзень кананічнай візітацыі парафіі.
Kапліца з бутавага каменя была пабудавана ў 1873 г. на новых парафіяльных могілках, а сёлета быў праведзены яе грунтоўны рамонт.
Пачэсная справа аднаўлення сакральнага будынка стала плёнам намаганняў пробашча парафіі кс. каноніка Віктара Мыслюка і шматлікіх ахвярных людзей, якія падтрымалі гэтую справу матэрыяльна і духоўна.
Асвячаючы капліцу, біскуп Кашкевіч выказаў удзячнасць усім, хто паспрыяў таму, каб яна «атрымала новае жыццё».
«Няхай Богу будзе падзяка за гэтую адноўленую капліцу, якая была ўзведзена стараннямі вашых продкаў», — дадаў іерарх.
Ва ўрачыстасці бралі ўдзел шматлікія парафіяне, якія не хавалі сваёй узрушанасці і радасці.
Адноўленая незадоўга да ўрачыстасці Усіх Святых і ўспаміну ўсіх памерлых вернікаў капліца стане месцам, дзе мясцовыя католікі будуць маліцца за памерлых продкаў, якія спачываюць на гэтых могілках.
