14 верасня парафія Божага Цела ў Нясвіжы адзначыла 425-ю гадавіну з дня цэлебрацыі першай святой Імшы ў гэтым касцёле.
Менавіта 14 верасня 1593 года адбылася першая Імша ў новазбудаванай святыні, якую пачалі ўзводзіць у 1589 годзе дзякуючы фундацыі Мікалая Крыштафа Радзівіла (Сіроткі).
З моманту пабудовы касцёл ніколі не быў зачынены і, нягледзячы на змены ў дзяржаўна-палітычным ладзе, тут заўсёды праходзілі набажэнствы. На пряцягу 425 гадоў людзі сустракаліся тут з Богам. Дзякуючы за гэты дар, падчас Імшы вернікі маліліся, каб святыня і надалей заставалася месцам спаткання чалавека з Богам.
Святую Імшу ў гэты дзень узначаліў дапаможны біскуп Мінска-Магілёўскай архідыяцэзіі Юрый Касабуцкі. У гаміліі іерарх прыгадаў сэнс і значэння крыжа, а таксама яго моц і перамогу, якую Хрыстус здзейсніў на крыжы.
Пасля св. Імшы вернікі атрымалі магчымасць ушанаваць рэліквію – часцінку дрэва Святога Крыжа, якую згодна з легендай у нясвіжскі касцёл прывёз Мікалай Крыштаф Радзівіл (Сіротка) з пілігрымкі са Святой Зямлі.
