23 жніўня ў Браславе завяршаюцца трохдзённыя рэкалекцыі для святароў, якія пасля заканчэння ўрачыстасцяў Маці Божай Валадаркі Азёраў праводзіў тут біскуп Фрэжюса і Тулона Дамінік Рэ з Францыі.
Рэкалекцыі, або духоўныя практыкаванні, з’яўляюцца неабходным сродкам духоўнага аднаўлення і ўмацавання. Гледзячы на іх важнасць для духоўнага жыцця, згодна з Кодэксам Кананічнага Права яны з’яўляюцца абавязковымі для духоўных асобаў.
Сэнс рэкалекцый найлепш перадаюць словы Езуса Хрыста: «Пакайцеся і верце ў Евангелле». Пакаяцца азначае змяніць, аднавіць сваё мысленне і тое, што ідзе за гэтым: змяніць свае паводзіны. Вернікі пакліканы няспынна ўдасканальвацца ў цнотах, каб такім чынам набліжацца да Бога. Езус Хрыстус паказвае сваім вучням сапраўдную дарогу, па якой кліча іх ісці за Сабою.
Для таго, каб вярнуцца на гэты Хрыстовы шлях праўды і любові, трэба спачатку супаставіць тое, што рэальна мае месца ў жыцці, з вучэннем Хрыста. Духоўнае жыццё святара і яго душпастырскае служэнне павінны быць напоўненыя пастаяннай працай над сабой. Адным з элементаў гэтай працы з’яўляюцца штогадовыя духоўныя практыкаванні — рэкалекцыі.
Сёлетнія рэкалекцыі ў Браславе сталі для духавенства Віцебскай дыяцэзіі цудоўнай магчымасцю паглыбіць свае адносіны з Хрыстом дзякуючы багатаму духоўнаму вопыту, якім шчодра дзеліцца з беларускімі святарамі французскі іерарх.
