Ва ўрачыстасць Сэрца Езуса, 8 чэрвеня, біскупы Беларусі заклікаюць маліцца аб святасці святароў і кансэкраваных асобаў.
ЗВАРОТ КАНФЕРЭНЦЫІ КАТАЛІЦКІХ БІСКУПАЎ У БЕЛАРУСІ
Глыбокапаважаныя святары, кансэкраваныя асобы, браты і сёстры!
Чэрвень — гэта месяц, прысвечаны асабліваму ўшанаванню Найсвяцейшага Сэрца Езуса.
Мы ўдзельнічаем у адмысловых набажэнствах, спяваючы літанію і ўзносячы нашыя просьбы, каб Збаўца ўчыніў нашыя сэрцы падобнымі да свайго Боскага Сэрца, напоўненымі верай, надзеяй і любоўю, што неабходна кожнаму чалавеку для рэалізацыі галоўнай мэты нашага стварэння і паклікання — святасці.
Дзеля дасягнення гэтай мэты Бог дае шматлікія сродкі і дапамогу, каб чалавек меў магчымасць паверыць у гэтыя Божыя дары, пазнаць і прыняць іх. Бог пасылае таксама пакліканых Ім людзей, святароў, манахаў і манашак, каб яны паказвалі шлях да Бога і дапамагалі чалавеку ісці да святасці. Заданне гэтых людзей — не толькі словам, але перш за ўсё сваім прыкладам і малітвай сведчыць пра Хрыста ў сучасным свеце.
30 красавіка 2018 г. падчас пленарнага пасяджэння Канферэнцыі Каталіцкіх Біскупаў у Беларусі іерархі нашай краіны звярнулі ўвагу на гэты важны аспект служэння Касцёла і пастанавілі правесці ва ўрачыстасць Найсвяцейшага Сэрца Езуса, 8 чэрвеня 2018 г., ва ўсіх касцёлах Беларусі дзень малітвы аб святасці святароў і кансэкраваных асобаў.
Просім падчас кожнай св. Імшы ў гэты дзень памаліцца ў гэтай інтэнцыі.
З благаслаўленнем
Біскупы Беларусі
